我實在好難向佢爸媽解釋點解凌晨3-4點入佢個囡間房一齊修理電腦…
一念無明，無人會明。
係，我係讀HigherDip EE，即高級電訊工程系。
有空自己會砌機研究下電腦，但女班長部電腦，上唔到網，中咗毒，唔夠位，唔夠快… 總之，部電腦xxx，就CALL 我上黎睇…
唉！Share Taxi 去到佢屋企，「順便」上去「好快」睇一睇，好快其實又1､2個鐘！轉眼天光，其實我知我係勁但都會眼睏架，大小姐！
對住佢實在收唔到把火，有果句講果句，真係唔留情面俾佢；
佢果D扮晒楚楚可憐扮柔弱嘅技量完全被我睇通晒！
唔夠人講道理就用水汪汪紅淚眼以退為進嘅策略，三分顏色上大虹扮大牌扮大小姐嘅任性公主性格，慳啲啦Baby，呢啲事大家未必知未必信。
不過，呢度唔係法庭，我雙眼就係証據！
記得有次深夜放工，佢又係類似「電腦Speaker 無聲叫我上黎睇原來無插電」嘅問題；攪到我身水身汗又要爬低落書枱又要開箱又要鑼絲批。
佢著OL牛仔裙踎低幫我開箱，後來佢發現好似唔係咁好意思，話想換件衫先至再開箱。
我就真係直接寸爆佢：「吓？！你係換就換條短啲出黎！！咪被我估中你走去換長褲＋樽領！」
頂！咁熟，咪玩啦！
攪掂完你唔訓，我都要返屋企訓啦；仲玩換衫，攞個十字鑼絲批過黎啦！
伯母可能知我地一齊做野真係辛苦，所以有時會留番D湯俾我地飲，
我上得去做深宵IT維修員，基本上全家都訓晒。
我過門都係客，就梗係留俾女班長當主人家親自招呼我啦！
咁！咪瀨野囉！
佢係廚房界真係公主黎架，唔識煲水架，翻熱呢啲咁深奧嘅技術，無十年八載俾佢係學唔識架，洗野會好d，佢有潔癖，用半支洗潔精洗幾隻碗，真係勁乾淨！
將啲湯翻熱，佢用「淨蒸翻熱法」！
即係「碗隔水蒸湯」！
我咁大個仔從來未見過呢個方法！
係從來，從來，係從來無見過！
經典！一絕！拍手！
如果佢當年用「紅燒鐵鑊無水焗熱法」，睇怕大家都睇唔到我寫呢段野俾大家睇。
下集預告：《潔辟怪＠11》