女班長極之怕污糟，入餐廳卡位唔會坐入面，因為怕污糟；巴士唔會坐入面，因為怕污糟。
殺菌酒精旁身，得閒攞出黎就搽兩搽捽兩捽；手袋長期有消毒紙巾，應該係用黎定驚…
ibank返工有時上更同事OT在公司開飯，我地有時都會痴餐食少少，公司長期備食具，女班長有時順手會幫手洗埋，之不過，如果佢做「值日生」，Pantry 果支全新洗潔精，應該只可以用到兩次…
我懷疑佢用洗潔精洗去水渠…
潔辟怪女班長，佢要求多多又要求高但以我所了解佢實在係眼高手低之輩；公主講就無敵做起黎時開汽水都無力！其實好多事要落手做過先知過程有幾辛苦同埋要幾多時間架，女班長！
我真係好想知佢自己一個人係點生活；我真係好想知佢去到荒島佢會變成點！
結果，飛雲！真・機會黎啦！
有一次團契小姐攪Wild CAMP；一行十多人去西貢半月灣島2D1N；世伯管教都幾嚴，好多野唔俾佢玩！佢少有咁JOIN 我地咁刺激嘅玩意！
我終於有幸見識佢點樣照顧自己…
當日在集合地點見到女班長出現，我腦海淨係出現《12隻恐龍去野餐》嘅畫面…
無錯，佢帶咗「12隻恐龍」咁多嘅物資去Wild Camp…點解佢可以咁架？！
個袋大到咁，根本係離家出走兼打算長居外地嘅內容。
我知好唔應該問但係真係好好奇究竟佢帶D咩野去CAMP，係咪驚「生寶床」訓唔慣自己帶埋個枕頭？定係帶埋電風筒諗住有機會備用呢？
WildCamp環境基本上咩都無，當晚BBQ 完咗各組員收搭細軟開始準備訓；女班長刷完牙後，佢話出去用埋牙線清一清就差唔多可以，叫大家訓先，唔洗等佢…
去WildCamp用牙線…係牙線…我覺得同見到恐龍無分別…
下集預告：《做我太太伴娘＠12》