我有一種關係感情叫黃穎賢《安哥女友?!＠17》

其實我對住女班長真係可以好真性情，基本上可以係佢面前放屁！
佢知我太多野，所以我對佢都好唔客氣，咁熟，咪玩啦！唔扮野，做自己啦！

對住佢真係有果句講果句，有碗話碗，有碟頭飯就叫碟頭飯。

係，係同碟頭飯無關係嘅！

直接啲講，係多層次多元化非線性嘅層壓式關係下知佢太多傻瓜野而我又好抵唔住頸會直接寸爆佢果種真性情，知情嘅見過嘅可以俾個LIKE或者留個言，等大家知我無吹水…

不過以下事件，就真係唔講得笑：

話說一次女俠與細玲玲牽頭吹雞游說辣妹與我去「雲南雨崩」，當時去到「香格里拉」辣妹出現高反而我立即中止行程改搭車落番低海拔地區；果次行程因有肺出腫危機突然賣甩佢地兩個女生到宜家都覺得非常唔好意思，如果佢地見字嘅話，我下次再請飲汽水賠罪。

「雨崩」係中國雲南一個極極極極極極極極極極極極極極極極極極極極極極極極極極極極極極極極極極極極極極極極極極極極極極極極極極極極極極極極極極極X 100000 之遍遠嘅地方。

無車要徒步自己帶物資行十個八個鐘先去到嘅地方。

零污染，人稱「世外桃園」。

聽女俠及細玲玲兩人勇闖雨崩；聽她們形容，不去簡直枉過此生；事隔一排，辣妹吹雞決定再戰雨崩！

辣妹搵咗細佢3-4年嘅侄女陪佢去，其實我都唔知係侄女大個，定係辣妹細，總之辣妹係姑姐，有個細佢3-4年嘅侄女，就係咁啦，再講好複雜…

利申：我對高反行山運動有潛在創作損失敏感侯群症，我無去

邀請咗好鍾意影相嘅大衛做同行攝影團友，大衛有勇闖西藏經驗，可以「磅住」！

辣妹Mark咗我地社團組織話事人都要叫佢做「安哥」嘅大佬陪同此遊，應該係負責睇場！真係全程有大佬照（顧）！

而我最估唔到，係辣妹預埋「女班長」一齊去。

係，無錯，雲南雨崩係一個神山雪水食物無添加環境無污染電話無訊號嘅與世隔絕世外桃園。

無車路只可徒步或高價租用「驢仔」載行李背包或者坐入去做代步工具。

全泥路程滿佈「爛泥尿水同埋極多驢仔屎」；濃度應該有80%….

對「潔癖怪」黎講，又係一條我到宜家都無法估算嘅心裡陰影面積算術題。

中間過程點樣入去路程有幾辛苦同時風景有幾咁嘩！嘩！嘩！嘩！全部唔係重點。

重點係佢地係雨崩參觀完當地藏族婚禮，唔知發生咩事，返港後安哥同女班長開始拍拖！！

女班長初初唔同我講。

佢嘗試扮晒若無其事嘅表情但講野口窒窒兼開始出晒佢嘅無限LOOP撓頭髮緊張小動作，見到我就紅都面晒！

我，內心極之矛盾忐忑滿腦各種思考衝激心情充滿問號感歎號咩符號都出晒都唔能夠形容嘅境界。

下集：大結局

我有條佢地去雨崩嘅Video，想睇可Whatsapp我