我諗呢十年八載就算食盡全世界嘅消化餅都消化唔到「女班長」係安哥女友關係嘅事實！
都唔知點面對佢，又唔知以後應該用咩語氣同佢講野，最大嘅唔知，係咪我應該仲同佢講野…
我係超級記仇小器怪。
直至一天，收到黃SIR因氣速入院消息，本不為然，但原來極之大鑊！
隔咗段好短嘅時間，情況急轉直下…安哥辣妹與我去探佢嘅時候，好多儀器插晒上身…
然後，身體轉差得好快….
之後，別了我們，安息到永恆國度。
我與女班長同輩，朋輩老爸對我，說話訓導輩份上其實也似係對自己仔囡；我與女班長老爸關係並不太遠；還清晰記得黃SIR隔著氧氣罩講：我們，是很親的人⋯⋯
很親的人。
在安息禮上，看著女班長與她家人臉上流乾嘅淚痕；我心，靜下來；重新審視新角度與關係。
我們，從年少懵懂經歷青葱，時間圖騰見証歲月友情；點滴累積彼此看顧互撐成長！
我同「女班長」嘅關係Formula，大概係＝
中學同學＋團契組員＋大專品牌院校同學＋小組正副組長＋工作同事＋痴餐怪食物供應所＋非牟利機構出版伙伴＋我太太的伴娘＋與太太一齊洗禮＋創作路上聲音導航＋同度生死＋我可以有果句講果句理想寸爆對象（寫住咁多先…）
天下間無一個女生可以比「女班長」更適合做我「亞嫂」，對我黎講呢個關係應該唔係咁易有！
今日，係佢同安哥嘅大日子。
對我黎講，「女班長」變「亞嫂」，只係再多一個身份！
能與呢位一齊成長嘅朋友繼續彼此看顧，一起變老，這感覺比親人更親；真心嘅！
段內容寫到呢度都差唔多，起呢個主題原因係想載番個頭盔；當「女班長」今日一步步踏入教堂，如果你見我滿臉淚水哭不成聲極之醜怪嘅時候，只係希望有人知道，因為我有一種關係感情，叫黃穎賢。
我相信，她會幸福。
我喊，係因為我都覺得自己好幸福。
-全集完-