中學屬新校品牌，新到連校舍都未起好。
我們首兩年借用鄉郊舊校，升至中三才轉換到全新現校址。
我呢啲品學兼優上進好學又係模範生候選人又考第三嘅，升上中三就被踢咗入精英班。
其實極唔開心，正正同期鄰班來了位插班女班花；
花香撲鼻，質素過去兩年前所未聞，不過需要重申，係除「亞佩」以外。
真・隔離飯香！
以為識落定晒格嘅同學，在全新上課區域全新設施，竟然有空降插班生做新同學，學校真係一個俾好多新鮮感同埋機會人嘅地方。
返學，又有番動力！
女班長剛剛就係同女班花同一班。
近水樓臺先得月，過去兩年與女班長建立嘅深厚友誼係時候轉化為扮熟藉口，以借書借筆借擦膠問功課扮交流為名，暗地提升與女班花見面溝通率為實。
一個無鏠私聊契機，我簡直係一個天才！
經過一段好長好長嘅日子，我諗都有一個月，終於成為女班花嘅私密友。
在平行時空裡，我情迷上校內話劇界台上長髮女主角。
正式啟動咗自己最正式嘅初戀。
好快，之後正式宣佈失戀。
傷心時間最需要得醫治。
女班長連同女班花，邀請我聖誕返唔知咩團契定教會，話想送禮物俾我同埋一齊join camp喎。
其實我keep 住都有被女生送禮物嘅習慣，好明顯佢地搵藉口…
我當時抱住上帝想拯救佢嘅羊，無論係想攪羊腩煲，或其他，我地正常人又點會估到佢用咩方式呢？
最重要知道佢有心，所以搵咗兩位使女落黎派彩…
之後斷斷續續跟女班長女班花開始返佢地嘅團契活動。
後來先知咩叫天仙局，因為「交換禮物」，諗番其實唔係淨收…
下集預告：《告別校園＠6》