想、寫、做

我有一種關係感情叫黃穎賢《告別校園@6》

發表於
我有一種關係感情叫黃穎賢《告別校園@6》
我有一種關係感情叫黃穎賢《告別校園@6》

初戀丫!我嘅初戀呀!

逝去感情如何留得住之我為何讓妳走;問世間,讀書為何物呢?點解教育制度無教治情傷?

面對台上女主角那種與她無名份的浪漫,我用了所有讀書嘅時間深度陶醉自憐自艾搵刀仔拮大脾自責嘅狀態!

基本上中四五兩年九成半時間專心治理災難式情痛,剩番個半成時間就係繼續同隔鄰班女班花,透過實驗研究點可以用文字及面談機制提升溝通率嘅寬度。

至於女班長,都過咗隔離班,一來我照顧唔到佢咁多,二來我有咩頭暈身慶都已經同女班花分享咗,無咩特別事就唔打擾佢…啦

根本上女班長同我都無咩野好傾,有野就留番西方春秋兩祭先講;唔係清明重陽!係復活同聖誕節…女班長與女班花一年總搵啲機會邀請同學返團契開X’mas Party交換禮物丫或者去聖誕CAMP 咁。

好快,轉眼就中學畢業。

畢業離開中學群,一般只會與幾位相熟同學內聚變朋友,其實轉Network 舊有社交圈子很易散。

我私校自修式重讀時,被個好靚同埋好甜嘅辣妹識咗,都幾嗒糖嘅!後來呢個女仔,差不多日日陪我去圖書館溫書,攪到我夠晒分入TC讀Double E HigherDip,適應Year 1新圈子後,獲大專同學「威廉王子」邀請返團契,點知係團契又遇番「女班長」…

其實返團契真係好Q悶,玩嘅遊戲有啲無聊詩歌啲詞又唔arm音,講啲聖經章節又唔識揭頁,成日講耶穌,咁娘… 點出黎行丫?

不過多個network,多個吹水圈吧!無野做無人約咪返下囉,斷斷續續咁返,因為其實我好少無人約無野做…有時間都同辣妹去下街啦!

直到Year 2;女班花竟然升咗上黎大專讀 Year 1,即係做咗我唔同系嘅同校學妹,咁我緊係好好關照佢嘅校園生活啦!因為佢讀BBA嘅同系Classmates,大部份都有校花嘅味道!

你知啦,過去多年與「女班花」建立嘅深厚友誼,係時候轉化為扮熟藉口…

在同行時空間,因契團活動及小組之名聚會,我們三人又聚番埋一齊。

但唔知咩機制,我們三人開始輪任正副小組長…

我諗,又係一個天仙局…


下集預告:《同渡青葱@7》