Final Year 最後一天考完試，當日已獲機會與幾位同學一齊去Interview，In完，即請！簡直係返工嘅黃金年代；我嫌工作路程遠最後無做到。
後來搵左好耐EE學系相關工種，都不合心水。
記得 In第N份工時，個師父話我讀咁多書，唔洗黎搵這類技工…
開始心灰意冷，果時剛巧agency 打來話有間金融公司招 Night shift data entry，問有無興趣試下。
我本人其中一項興趣，就係好鍾意「打字聲」，所以走左去In。
當時對融資行業真係一張白紙，咩叫股票都唔識，仲問有無聽過「摩根士丹利」「JP摩根」…
大魔？！係龍珠好似有聽過，類似笛子魔童果類野嘛！
當然我無講出口，只淨係諗，會唔會扼我買「倫敦金」，然後話炒輸晒呢？！話晒我銀行有成幾萬蚊！
都唔知你地間咩公司，神神秘秘，bank 就bank啦，又要investment bank，又唔知做咩，可唔可以解釋下投資咩銀行咁巴閉呢？
誤打誤撞之下，就入左間叫「GOLDMAN SACHS」嘅公司…
我返工時好小心，唔會帶信用咭，驚佢地會屈我錢要碌我張咭叫我買「倫敦金」，然後話係將啲「投資」放入佢地「銀行」。
好明顯，成件事將會係一個完美嘅天仙局！
入職首兩星期，係Training period；放工過11PM可以搭的士返屋企。
吓？！中環返我屋企，要成$300一程喎！
公司話無問題，憑的士收據單出糧月結，放心！係公司福利喎（暗喻大把錢）…
另外OT超兩個鐘，每人有$200飯錢；
勞工假期返工人工當日三倍計…
月尾見真係有糧出，又無叫我買「倫敦金」；
上司Viviane話downtime無事做可以睇雜誌，工作間Keep住開收音機；話有助提升創作靈感！
做左一、兩個月左右，公司問仲有無人介紹入黎做…
我見大專同學個個都入晒行，就轉試搵中學朋友圈。
個個聽完話做data entry ，無咩興趣…
我搵左中學同學P，佢本身具書記經驗；另外搵埋「女班長」，俾公司揀下。
結果，我地一齊入咗ibank工作，做咗同事！
下集預告：《Night Shift＠9》